23年前︳梁詠琪與自己首張國語專輯同框 顛覆網民時間觀念:冇變過合理嗎？

44歲嘅梁詠琪（Gigi）出道廿多年，一直保養得宜，尋日佢喺社交平台拎住自己23年前嘅第一張國語專輯合照，封面同而家嘅佢同樣是短髮配黃衫，Gigi亦做出同一個眼神和笑容，完全冇變過咁，相當犀利。

梁詠琪留言：「今天重溫多年短髮造型時，無意中對比了一下現在的我，和以前第一張國語專輯的模樣...發現這一頭短髮不經不覺已經陪伴你我成長20年，而且剛巧也是一襲淡黄衣、帶著同一個微笑、同一個眼神，繼續做個熱愛生命熱愛生活的短髮女孩❤️ #梁詠琪20年前後對比照#」網民見到都覺得太誇張，令大定開始質疑自己嘅二十年同Gigi嘅二十年係咪唔一樣：「冇變過合理嗎？」，唔少人都跪求Gigi分享凍齡妙法！

梁詠琪多年嚟都以招牌短髮示人，當年一曲《短髮》更令Gigi成為當紅樂壇玉女。對比起長髮，Gigi多變的短髮造型更深入民心，就連囡囡Sofia都睇唔慣佢嘅長髮造型，講咗一句：「Well…it’s not your style!」

Gigi曾經Post出自己90年代嘅舊照，表示自己十幾歲時鍾意留長頭髮，不過唔喜歡花時間整理，所以18歲初嘗短髮後，天然長髮Look從此成為絕響。不過Keep住廿幾年短髮都唔係最堅，最堅相信都係Gigi童顏不老嘅靚樣，同埋同廿幾歲時一樣嘅身材！

撰文：黃蘊姿